Мойынқұм ауылындағы Жазылбек Қуанышбаев атындағы музейде ауданның ақсақалдары мен жастарының қатысуымен «Ерлік ешқашан ұмытылмайды» тақырыбында экскурсия ұйымдастырылды. Экскурсия барысында жиналғандарға Ұлы Отан соғысына қатысқан ардагерлердің суреттері, экспонаттары мен экспозициялары музей ұжымы тарапынан таныстырылды. Сондай-ақ Ұлы Жеңістің 80 жылдығына орай Жеңіс саябағына ауданнан майданға аттанған ардагерлердің есімін мәңгілікке қалдыру мақсатында арнайы жиын өтті.
Музейдің кіші залында Мойынқұм ауылының ардагерлер кеңесінің төрағасы, қадірлі ақсақалымыз Мұқанбетқұл Сабыровтың еңбегі ерекше аталып өтті. Ақсақал өз күшімен 3130 майдангердің тізімін жинақтап, олардың ерлігі мен есімін ұрпақ жадында қалдыруға зор үлес қосты.
Жиында ардагерлер тізімін толықтыру, кейбір есімі енбей қалған майдангерлерді енгізу жайы да кеңінен талқыланды. Егер сіздің ата-әжеңіз соғысқа қатысқан болса, есімі тізімде бар-жоғын Жастар орталығының маманы Таңшолпан Құлбаевадан (87002653489) нақтылап біле аласыз. Бұл – тарихи әділдікті қалпына келтіру жолындағы маңызды қадам. Ерлік ұмытылмайды! Ұрпақ парызы – батырлардың есімін жаңғырту.
