Жуырда аудан әкімдігінің мәжіліс залында аудандық қоғамдық кеңестің кезекті отырысы өтті. Жиынға қоғамдық кеңес төрағасы Сағынғали Аманов төрағалық етті. Отырысқа аудандық мәслихаттың төрағасы Нұртас Саурықов, «AMANAT» партиясы аудандық филиалының төрағасы Манарбек Көшкімбаев, аудан әкімдігінің бас инспекторы Ғазизбек Сырымбетов, сондай-ақ ҚР Мемлекеттік қызмет істері агенттігінің Жамбыл облысы бойынша департаментінің мемлекеттік көрсетілетін қызметтер басқармасының бас маманы Гүлнұр Сейдуалиева ZOOM бейнебайланысы арқылы қатысты.
Отырыста бірқатар маңызды мәселелер қаралып, тиісті сала басшыларының есептері тыңдалды. Қоғамдық кеңес мүшелері тарапынан баяндамашыларға нақты сұрақтар қойылып, ұсыныстар мен пікірлер айтылды.
Күн тәртібінде: аудан көлеміндегі қоғамдық тәртіптің жай-күйі, мектеп оқушыларының жазғы демалысын ұйымдастыру, жер қатынастары бөлімінің қызметі, ауданның жаңа логотипі жобасы, бірқатар ауылдық округ әкімдерінің хабарламалары қаралды.
Отырыс барысында қоғамдық кеңес мүшелері Бағлан Жүнісбеков, Жұманазар Көдеков және Шахикерім Исабеков ауылдағы қоғамдық тәртіп, жасөспірімдердің бос уақытын тиімді ұйымдастыру, жерлерді мемлекет меншігіне қайтару және мал ұрлығының алдын алу мәселелері бойынша нақты ұсыныстарын білдіріп, бұл бағыттағы жұмыстардың орындалуын бақылауды тиісті мекемелерге тапсырды.
Жиын соңында қоғамдық кеңес төмендегідей шешімдер қабылдады:
Аудандық полиция бөлімінің басшысы Алмас Көпбаевтың қоғамдық тәртіп туралы, аудандық білім бөлімінің басшысы Жайдар Жазықбаевтың жазғы демалысты ұйымдастыру туралы, жер қатынастары бөлімінің басшысы Эльдар Кокушевтің есептері назарға алынды, Мойынқұм ауданының жаңа логотипінің жобасы мақұлданды.
Биназар және Хантау ауылдық округтері әкімдерінің хабарламалары қабылданды.
Сонымен қатар, отырыста мемлекеттік көрсетілетін қызметтердің сапасын арттыру бойынша бірқатар ұсыныстар да қабылданды.
Атап айтқанд, сыбайлас жемқорлық тәуекелдерін болдырмау мақсатында тұрғындарға электронды қызмет көрсетудің артықшылықтарын кеңінен түсіндіру;
Мемлекеттік қызмет көрсету қағидаларын халыққа жеткізу бойынша тұрақты кездесулер ұйымдастыру;
Қызмет көрсетуден бас тарту кезінде нақты себептерді заңнамалық негіздерге сілтеме жасай отырып көрсету;
Бас тартуға негіз болған жағдайда қызмет алушымен тыңдалым рәсімдерін өткізу;
Қызмет көрсету мерзімдері мен тәртібінің бұзылмауын бақылау;
Мемлекеттік көрсетілетін қызметтер туралы ақпаратты әлеуметтік желілер мен БАҚ арқылы жүйелі түрде жариялап отыру;
Өз-өзіне қызмет көрсету бұрыштарының жұмысын жандандырып, оның халық арасында қолжетімділігін арттыру.
Аталған ұсыныстар мен қабылданған шешімдер қоғамдық бақылауды күшейтіп, жергілікті атқарушы органдар жұмысының ашықтығы мен тиімділігін арттыруға бағытталған.
