Ауданымызда Ауыл шаруашылығы санағы қарсаңында ауыл шаруашылығы саласындағы маңызды жұмыстар бастау алды. Бұл санақ – ел экономикасының негізгі тірегі болып саналатын аграрлық сектордың қазіргі жағдайын бағалау мен оның даму бағыттарын нақты айқындауға бағытталған маңызды іс-шара.
Қазіргі таңда аудан бойынша барлық ауылдық округтерде санақ офлайн форматта өткізілуде. Арнайы мамандар ауыл-ауылды аралап, тұрғындардың мал басы, егістік көлемі және басқа да ауыл шаруашылығы көрсеткіштері туралы нақты деректер жинауда. Бұл мәліметтер аудан мен облыс деңгейінде ауыл шаруашылығын дамытудың стратегиялық шешімдерін қабылдауда, сондай-ақ шаруаларға мемлекеттік қолдау тетіктерін тиімді жоспарлауда үлкен рөл атқарады.
Мамандардың айтуынша, ауыл шаруашылығы санағы – тек статистикалық шара емес, елдің азық-түлік қауіпсіздігі мен аграрлық әлеуетін арттырудың басты құралы. Жиналған ақпарат ауыл шаруашылығына арналған субсидия, несие және инфрақұрылымдық жобаларды әділ бөлуге мүмкіндік береді. Сондай-ақ, мал шаруашылығы, егіншілік және ауыл кәсіпкерлігі бағыттарындағы нақты жағдайды айқындауға, болашаққа жоспар құруға негіз болады.
Мойынқұм өңірі ежелден мал және егін шаруашылығына бейім аудан. Мұндағы әрбір түтін мал ұстап, жер егіп, тіршілігін еңбектен тауып отыр. Сондықтан, бұл санақ – жергілікті шаруалар үшін де маңызды мүмкіндік. Ол арқылы ауыл тұрғындарының нақты жағдайы көрініп, мемлекет тарапынан қолдау алуға жол ашылады.
Аудан әкімдігі барлық тұрғындарды санақ жұмыстарына белсенді қатысып, өз мәліметтерін уақытылы беруге шақырады. Әр азаматтың берген дерегі – ауыл шаруашылығының өркендеуіне, жергілікті экономиканың нығаюына қосылған үлес.
Ауыл шаруашылығын дамыту – елдің тұрақтылығы мен болашағының кепілі. Сол себепті, «Ауыл шаруашылығы санағы – 2025» тек есеп емес, ауыл өмірін жақсартуға бағытталған нақты қадам болып табылады.
