Шұғылалы көктемнің көркем мейрамы қарсаңында «AMANAT» партиясы аудандық филиалының төрағасы Манарбек Көшкімбаев, аудандық «Жастар ресурстық орталығының» директоры Мади Күнту және бұқаралық ақпарат құралдарының өкілі Мойынқұм ауылының тұрғындары, «Алтын алқа» иегерлері, ақ жаулықты батыр аналар, 9 бала тәрбиелеп, 24 немере, 16 шөбере сүйіп отырған Сөкен Қариева мен 10 баласынан 49 немере 20 шөбере сүйіп отырған Алмагүл Шуылдақовалардың үйінде болып, мерекелерімен құттықтап, сый-сияпат жасады. Сондай-ақ төңірегіне шырай беріп, ұрпақтарына үлгі болып отырған апалардың мерекеден-мерекеге, аман-есен жете берулеріне тілектес екендерін айтып, ел үшін сіңірген еңбегі үшін алғыстарын жеткізді. Өз кезегінде ол кісілер де аналық ризашылықтарын айтып, ақ баталарын берді.
Өмірге он бала әкеліп, немере-шөберелерінің қызығын көріп отырған әжелердің ұрпақтары бүгінде өңірдің сан саласында абыройлы қызмет етуде.
