Өткен аптада қарашаның үшінші жексенбісі – «Ауыл шаруашылығы, тамақ және өңдеу өнеркәсібі қызметкерлері» күніне орай игі шаралар легі өтті. Атап айтар болсақ орталық Абылайхан алаңында ауыл шаруашылығы техникаларының көрмесі өтті. Көрмеге «YTO» және «LOVOL» ауыл шаруашылығы техникаларын өндіруші компаниялардың өкілдері өздерінің техникаларын шаруалардың назарына ұсынды.Сонымен қатар, аудандық мәдениет үйінің ауласында ауыл шаруашылығы өнімдерінің жәрмеңкесі ұйымдастырылды. Жәрмеңкеде ет-сүт, балық өнімдері, көкөністер мен бақша дақылдары, тары-талқан сияқты азық-түлік тауарлары нарықтағы бағадан 25-30 %-ға арзан сатылып, тұрғындарға тиімді бағамен таратылды. Жалпы ауыл шаруашылығы тауары жеткілікті көлемде ұсынылып, сауда жасағандар ризашылықтарын білдіріп жатты.
Сонымен қатар аудандық мәдениет үйінің фойесінде мерекелік тақырыпқа сай көрме ұйымдастырылды. Онда ауданымызда өндірілетін қазба байлықтары мен бақша дақылдары қойылды.
Содан соң аудандық Мәдениет үйінде мерекелік салтанатты жиын болды. Ауыл шаруашылығы қызметкерлері күні биыл осымен 25-рет атап өтіліп жатыр. Бұл еліміздегі миллиондаған фермерлер, мал шаруашылығы мамандары, агрономдар, шаруа қожалық иелерінің еңбектерін елеп, кешегі мен бүгінгіні саралап, болашаққа жоспар құратын кәсіби мереке. Салтанатты жиынға Жамбыл облысы әкімдігі ауыл шаруашылығы басқармасының басшысы Көшенов Қайрат Есенұлы арнайы келіп, ауданның шаруаларын құттықтап, ақ тілегін білдіре сөз сөйлеп бірқатар сала қызметкерлері мен фермерлерге марапаттар тапсырды.
Келесі кезекте аудан әкімі Карентаев Ермек Амангелдіұлы құттықтау сөз сөйлеп, сала мамандарын түрлі наградалармен марапаттап, бағалы сыйлықтар табыс етті.
Осы ретпен аудандық мәслихаттың төрағасы Саурықов Нұртас Ұзақұлы мен «AMANAT» партиясы аудандық филиалының төрағасы Көшкімбаев Манарбек Өсербекұлы да құттықтау сөз сөйлеп, бірқатар сала қызметкерлерін марапаттады.
Жиын соңы аудандық мәдениет үйінің өнерпаздары ұйымдастырған концерттік бағдарламаға ұласты.
