М.Жұмабаев атындағы мектеп-лицейінде маңызы зор ата-аналар жиналысы өтті. Жиынның негізгі тақырыбы — жасөспірімдер арасындағы кибербуллинг пен қатыгездік мәселелері болды.
Іс-шараға аудан әкімінің орынбасары Мейірхан Төлеулиев, аудандық ардагерлер, қоғамдық кеңестерінің төрағалары Жұманазар Көдеков пен Сағынғали Аманов, сондай-ақ мектеп директоры Шыңғыс Жашаралин және мектеп ұжымы мен ата-аналар қатысты.
Кездесу барысында жасөспірімдер арасындағы құқықбұзушылықтың салдары, оның алдын алу жолдары және ата-аналардың бала тәрбиесіндегі рөлі жайлы жан-жақты сөз қозғалды. Қоғам өкілдері жасөспірімдер тәрбиесіндегі өзекті мәселелерді көтеріп, ұрпақ тәрбиесіне тек мектеп емес, ата-ана, қоғам болып жұмыла жұмыс атқару қажеттігін баса айтты.
Сонымен қатар, жиналыс барысында ата-аналар өзекті әлеуметтік-тұрмыстық мәселелерге де назар аудартты. Атап айтқанда:
•мектеп пен мектеп асханасына күрделі жөндеу жүргізу;
•мектеп маңына жарық шамдарын орнату;
•жаяу жүргіншілер жолын салу;
•қаңғыбас иттер мәселесін шешу туралы ұсыныс-пікірлерін білдірді.
Бұл мәселелер тиісті мекемелер мен жергілікті билік өкілдерінің назарына ұсынылып, бақылауға алынатыны айтылды.
Жиын қорытындысында ата-аналар мен мектеп әкімшілігі бала тәрбиесінде бірлесе жұмыс істеудің маңыздылығын тағы бір мәрте атап өтіп, өзара тығыз байланыста болуға уағдаласты.
Дәл осындай ата-аналар жиналысы ауданымыздың барлық мектептерінде болды.
