Өткен аптада аудан әкімінің орынбасары, аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссиясының төрағасы Мейірхан Төлеулиевтің төрағалығымен кезекті комиссия отырысы өтті.
Отырыстың күн тәртібінде «6 жасқа дейінгі балаларды сапалы мектепке дейінгі тәрбиемен және біліммен қамтамасыз ету туралы», ««Бестерек» жобасының жүзеге асырылу барысы, яғни аутодеструктивті мінез-құлықты кәмелетке толмағандарды анықтау, диагностикалау және оңалту бойынша жүргізілген жұмыстар, олардың діни сауаттылығын көтеру, еңбегін пайдалануда заң талаптарының орындалуы, қылмыс және құқық бұзушылық жасаған жасөспірімдерді өнерге баулу, спорттық секциялармен қамту туралы», «Балаларды скринингтік тексерулермен қамту және білім мекемелеріндегі медициналық қызмет көрсету туралы», «Ерте жүктіліктің алдын алу шаралары туралы», «Мойынқұм аудандық санитариялық-эпидемиологиялық бақылау басқармасының мектеп асханаларындағы оқушылардың тамақтану сапасына жүргізілген мониторинг жұмыстары туралы» мәселелер қаралды.
Аталған мәселелер бойынша аудандық білім бөлімінің басшысы Жайдар Жазықбаев пен аудандық орталық ауруханасы бас дәрігерінің орынбасары Бағлан Жүнісбеков хабарлама жасады.
Күн тәртібіндегі мәселелер талқыланып, Мейірхан Берікұлы тиісті мекемелерге нақты тапсырмалар берді және орындалуы бақылауға алынатынын жеткізді.
