Жуырда аудан әкімдігінің мәжіліс залында Қоғамдық кеңестің кезекті отырысы өтті. Кеңес төрағасы Сағынғали Амановтың жетекшілігімен өткен жиында аудан өміріне қатысты бірқатар өзекті мәселелер қаралды.
Күн тәртібіне сәйкес, алдымен мемлекеттік көрсетілетін қызметтер саласындағы заңнаманың орындалу барысы туралы Мирный ауылдық округінің әкімі Сайнұр Аманов және Ақсүйек ауылдық округінің әкімі Ғани Жүнісов баяндама жасады.
Келесі мәселе – күзгі тазалық айлығының өткізілуі мен көктемгі тазалық науқанының қорытындысы туралы болды. Бұл бағытта Мойынқұм ауылдық округінің әкімі Рүстем Тұрарқұл есеп беріп, алдағы жұмыстарға тоқталды.
Сонымен қатар, 2025 жылдың «Жұмысшы мамандықтар жылы» болып жариялануына орай «Мансап» орталығының басшысы Бақыткүл Қалымбетова орталықтың атқарып жатқан жұмыстары мен жоспарлары туралы баяндады.
Отырыс барысында «Мойынқұм ауданы бойынша әлеуметтік көмек көрсетудің қағидаларына өзгерістер енгізу туралы» жобаны аудандық жұмыспен қамту және әлеуметтік бағдарламалар бөлімінің басшысы Самат Тынышбеков ұсынды. Ал аудандық қаржы бөлімінің басшысы Лаура Қазақбаева «Салық салу объектісінің орналасуына байланысты аймаққа бөлу коэффициентін бекіту туралы» қаулы жобасымен таныстырды.
Қоғамдық кеңес мүшелері баяндамашыларға сұрақтар қойып, өз ұсыныстарын білдірді. Әсіресе, аудан орталығы мен оның айналасындағы тазалықты қамтамасыз ету мәселесіне ерекше назар аударылды. Кеңес мүшелері Мойынқұм ауылдық округінің әкімі Рүстем Тұрарқұлға қоқыс тазалау жұмыстарын жеделдетіп, жылыту маусымына дейін дайындықты толық аяқтауды тапсырды.
Кеңес төрағасы Сағынғали Аманов отырысты қорытындылай келе, талқыланған мәселелер бойынша қабылданған шешімдер мен ұсыныстарды жариялап, олардың орындалуын бақылауға алу қажеттігін атап өтті.
