Аудан әкімдігінің мәжіліс залында Жамбыл облыстық аумақтық сайлау комиссиясының төраға орынбасары Талғат Салқанұлы Жамаловтың және аудан әкімі Ермек Амангелдіұлы Карентаевтың қатысуымен «Мойынқұм аудандық аумақтық сайлау комиссиясының 2025 жылы атқарған жұмыстары туралы» кеңейтілген комиссия отырысы өтті.
Отырыста аудандық мәслихат төрағасы мен депутаттары, құқық қорғау және сайлау процесіне қатысты уәкілетті мемлекеттік органдардың басшылары, аудан әкімі апппаратының басшысы, аудан әкімдігінің бөлім басшылары, ауылдық округ әкімдері, аудандық қоғамдық кеңес төрағасы, аудандық ардагерлер кеңесінің төрағасы, жергілікті қауымдастық төрағалары, саяси партиялар мен үкіметтік емес ұйымдардың төрағалары, бұқаралық ақпарат құралдарының өкілдері, округтік және учаскелік сайлау комиссияларының мүшелері қатысты.
Комиссия отырысында Мойынқұм аудандық аумақтық сайлау комиссиясының төрағасы Сержан Қалхаманұлы Садуақасов аудандық аумақтық сайлау комиссиясының 2025 жылы атқарған жұмыстары туралы баяндап, 2026 жылға қойылған міндеттерімен бөлісті.
Сонымен қатар, аудан әкімі аппаратының басшысы Нұркелді Қазақбайұлы сайлаушылар тізімін өзектендіру және заңнама талаптары аясында жергілікті атқарушы орган мен сайлау комиссияларының өзара іс-қимылы туралы баяндады.
Жамбыл облыстық аумақтық сайлау комиссиясының төраға орынбасары Талғат Салқанұлы Жамалов комиссия отырысының маңыздылығы, облыс көлеміндегі сайлау мәселелері, сайлау жүйесіндегі жаңа реформалар, сайлаудың ашықтығы мен жариялылығы, кандидаттардың сенім білдірген адамдары мен саяси партиялардың байқаушыларының құқықтары мен міндеттері, сайлаушылар тізімдерін өзектендіру жұмыстары туралы баяндады. Сонымен қатар Қазақстан Республикасының Орталық сайлау комиссиясының төрағасының Алғыс хатын №308 сайлау учаскесінің төрайымы Жанысова Балтакүл Уркенбайқызына табыстады.
Комиссия отырысында аудан әкімі Ермек Амангелдіұлы Карентаев кеңеске қатысушыларға ізгі тілектерін білдіріп, сайлауға белсенді қатысқан комиссия мүшелерін құрмет және алғыс хаттармен марапаттап, комиссия отырысын қорытындылады.
