Осы аптаның сәрсенбісінде аудандық пошта тарату мекемесінің алдында аудан әкімдігінің ұйымдастыруымен Жамбыл облыстық ішкі саясат басқармасының «Қоғамда сыбайлас жемқорлыққа қарсы мәдениетті қалыптастыру жөніндегі іс-шараларды ұйымдастыру» атты мемлекеттік-әлеуметтік тапсырысы бойынша сыбайлас жемқорлыққа қарсы волонтерлік жоба аясында сыбайлас жемқорлыққа қарсы мобильді топ мүшелері аудан тұрғындарын қабылдады. Қабылдауға аудан әкімінің орынбасары Мейірхан Берікұлы Төлеулиев, ҚР Сыбайлас жемқорлыққа қарсы іс-қимыл агенттігінің Жамбыл облысы бойынша департаментінің бас маманы Айбек Итқараұлы Әжібаев адам құқықтары жөніндегі уәкілдің Жамбыл облысы бойынша өкілі Берікбол Ұзақұлы Байғожаев, «Әділдік жолы» ҚРҚБ ЖОФ жетекшісі, Жамбыл адалдық алаңы ЖО басшысы, Жамбыл облыстық қоғамдық кеңес мүшесі Назима Дәрменқызы Жұбандықова, «Тараз» әлеуметтік-кәсіпкерлік корпорациясы АҚ-ның қызметкері, жеке сот орындаушы, адвокат, нотариус, заң консультанты, аудан әкімдігінің жұмыспен қамту және әлеуметтік бағдарламалар, экономика және бюджеттік жоспарлау, тұрғын үй коммуналдық шаруашылық жолаушылар көлігі және автомобиль жолдары, жер қатынастары, ауыл шаруашылығы, дене шынықтыру және спорт бөлімдерінің басшылары, «AMANAT» партиясы Мойынқұм аудандық филиалының төрағасы, аудандық мәслихаттың депутаты Манарбек Өсербекұлы Көшкімбаев, аудандық қоғамдық кеңестің төрағасы Шахикерім Әміреқұлұлы Исабеков, аудандық «Мансап» орталығының директоры Бақыткүл Алдасүгірқызы Қалымбетова, аудандық білім бөлімі басшысының міндетін атқарушы Бақыткүл Тұрсынханқызы Әжіғұлова қатысты.
Қабылдау барысында көптен бері өздерін толғандырып, оған жауап іздеп жүрген ауыл тұрғындары өздерін мазалаған сауалдарын қойып, нақты кеңес алды. Кейбіреуінің күрмеуі шешілмей жүрген түйткілді мәселелері сол жерде шешіліп, тиісті орын басшыларына тапсырмалар берілді.
Қабылдау азаматтарға қолайлы жағдай жасау және сыбайлас жемқорлыққа қарсы мәдениет қалыптастыру бағытында өтті. «Адалдық алаңы» жобасы ел Президентінің 2018 жылдың 5 қазанындағы Қазақстан халқына арнаған Жолдауынан туындаған міндеттерді жүзеге асыру мақсатында құрылған. Жоба құрылған күннен бастап, жемқорлықтың жолын кесуде бірқатар шаруаларды жүзеге асырды. Аспан астындағы қабылдау шарасы аудан әкімдігінің мәжіліс залында жалғасқан жиынға ұласты. Жиынға аудан, ауыл әкімдіктерінің, аудан әкімдігі бөлімдерінің мамандары, ауыл, ауылдық округ әкімдері, мекеме басшылары, БАҚ өкілі қатысты. Жиынды аудан әкімінің орынбасары Мейірхан Төлеулиев ашып, облыстан келеген мобильдік топ мүшесі Айбек Әжібаевқа сөз берді.
А.Әжібаев өз сөзін сыбайлас жемқорлыққа байланысты заңдар мен нормативтік құжаттардың басты деген бағыттарын 30 топқа біріктірген слайд арқылы жатық тілмен баяндап берді. Оның айтуынша, сыбайлас жемқорлық кез келген елдің өркендеп дамуына кері әсерін тигізетін негізгі фактор екен. Ол мемлекеттік органдардың тиісті қызмет атқаруына кері әсерін тигізіп, беделіне нұқсан келтіреді. Заң үстемдігін теріске шығарып, азаматтардың конституциялық құқықтары мен заңды мүдделерінің бұзылуына түрткі болады. Мемлекет пен қоғамның тұрақтылығына қауіп төндіріп, жүргізіліп жатқан экономикалық әлеуметтік реформаларға орасан кедергі жасайды. «Қазақстан Республикасының Сыбайлас жемқорлыққа қарсы іс-қимыл» туралы Заңының 22-бабына сәйкес, сыбайлас жемқорлыққа қарсы іс-қимылды өз құзыреті шегінде барлық мемлекеттік органдар, ұйымдар, квазимемлекеттік сектор субъектілері мен лауазымды адамдар жүргізуге міндетті. Сыбайлас жемқорлыққа қарсы күрес мемлекет саясатының басым бағеыттарының бірі ретінде айқындалған дей келе Айбек Әжібаев одан әрі агенттіктің заңнаманы жетілдірудегі рөлі, пара беруші мен пара алушыларға қолданылатын жаза мен жауапкершілігі, сыбайлас жемқорлық туралы хабарлаған азаматтарға берілетін сыйақы жүйесі, мөлшері, сыбайлас жемқорлық пен істі болған тұлғаларға шартты түрде мерзімінен бұрын босату шарасының қолданылмайтындығы, құқық қорғау органдары қызметкерлерінің, судьялардың, пара берушілердің және парақорлыққа делдал болғандардың жазасы қатаңдатылғанын, мемлекеттік қызметшілердің, депутаттардың, судьялардың, шетел банктерінде есеп шотын ашуға шектеу қойылғанын, жемқорлық сипаттағы қылмыс пен ұсталғандарға мемлекеттік қызметте, квазимемлекеттік секторда жұмыс істеуіне өмір бойы тыйым салынатындығын айтты. Сондай-ақ ол сыбайлас жемқорлық туралы заңға 2024 жылы енгізілген өзгерістерге, 2025-2026 жылдары енгізілетін өзгерістерге тоқталып өтті. Содан соң «Әділдік жолы» РҚБ ЖОФ жетекшісі, Жамбыл адалдық алаңы жобасының басшысы Назима Дәрменқызы Жұбандықова сөз алып, өз саласы бойынша атқарылған жұмыстар, адалдық алаңының мақсаты, міндеті туралы айтып берді.
Жобаның негізгі мақсаты – сыбайлас жемқорлық деңгейін төмендету, сыбайлас жемқорлыққа деген төзбеушілікті қалыптастыру, облыстағы мемлекеттік билік институттарына азаматтарының сенімін арттыру болса, жобаның негізгі міндеттері тұрғындардың сыбайлас жемқорлыққа қарсы мінез-құлық үлгісін одан әрі дамыту мен жемқорлық мәселесін, мемлекеттік қызмет көрсету сапасын арттыру арқылы шешу, тұрмыстық жемқорлықты жою, азаматтар және бизнес үшін, кедергісіз және қолайлы жағдайлар жасау, мемлекеттік органдар қызметінің ашықтығы, ауқымды қоғамдық бақылау жүргізу болып табылады. Жоба аясында мемлекеттік мекеме қызметкерлерінің еңбекақысын қайта қарау, мекеме басшыларының жеке жауапкершілігін арттыру, қызметкерлердің барлық бағыттары бойынша сыбайлас жемқорлыққа қарсы іс-қимылды арттыру және тағы басқа мәселелер қамтылады. Жоба тұрмыстық сыбайлас жемқорлықты жоюға және азаматтарға ыңғайлы жағдай жасауға, қоғамдық бақылауды жүргізуге, сонымен қатар сыбайлас жемқорлық мәдениетті қалыптастыруға бағытталған,-деді ол.
Жиында қатысушылар тарапынан бірнеше сауалдар қойылып, оған тұщымды жауаптар берілді.
Жиынды аудан әкімінің орынбасары Мейірхан Төлеулиев қорытындылады.
