Аудан орталығынан шалғайда орналасқан, жыл сайын көркейіп келе жатқан ауылдардың бірі – Ұланбел ауылы. Ауылды абаттандырып, гүлдендіру мақсатында мемлекеттік қызметші Талғат Алпысбайұлы ауыл жастарының қолдауымен «Жайнасын көркем, Ұланбелім!», ұранымен «Ұланбел қорын» ұйымдастырып, ауылды жаңғырту мақсатында ауқымды тірлікті бастап кетті. Атап айтқанда, ауылға кіре беріс қақпаның жанынан төлқұжат стелласы мен киіз үй құрылысы, тал-дарақтар егу жұмыстары атқарылуда.
«Ілкімді іс ауыл жастарын, Ұланбел ауылынан шыққан азаматтарды, кәсіпкерлерді тарта отырып ұйымдастырылды. «Ауылды абаттандыру-ортақ іс», игі іске көмектесіп жатқан ауыл тұрғындарына, жастарға, кәсіпкерлерге алғысымыз шексіз» –дейді Т. Алпысбайұлы.
–Қазіргі таңда ауылымызда 3 көшеге асфальт салу, 3 көшеге жарық шамдар орнату жұмыстары жүргізілуде. Ауылдың атына сай, заманауи болғаны әрбір тұрғын үшін мақтаныш емес пе?, — дейді ауылдық округ әкімі Еркебұлан Абасұлы.
Елді бірлікке ұйытып, үлкен іс атқарған азаматтарға халық алғыстарын жаудыруда.
