Аудан әкімдігі ішкі саясат бөлімі Жастар ресурстық орталығының ұйымдастыруымен Мыңарал ауылдық округінде «Таза Қазақстан» акциясы ұйымдастырылды.
Таза Қазақстан — ластанған аумақтарды қалдықтардан тазартуға, экологиялық ағарту жұмыстарын жүргізуге және тұрғындардың экологиялық сауаттылығын арттыруға бағытталған акция. Аз уақыттың ішінде экологиялық акция еліміздің түкпір-түкпірінде кең етек жайды.
Бүгінде таза Қазақстан республикалық акциясы еліміздің барлық аймағында жалғасын тауып, жалпыхалықтық эко-челленджге айналды.
Өлкемізде де жалпы ұлттық экологиялық акцияны өткізу арқылы табиғат анаға деген шексіз махаббат пен қоқыс тастау мәдениеті қалыптасты десек артық айтпаймыз.
Бүгінде ауданда жастармен қатар, мемлекеттік мекеме қызметкерлерінің де экологиялық акцияға қатысу белсенділігі күн санап артып, өздеріне тиісті аймақтарды қоқыс қалдығынан тазартуда.
Қазақтың «атадан мал қалғанша тал қалсын» — деген аталы сөзі аталмыш акциямен үндесіп жатқандай. Алдағы уақытта тек ресми түрде ғана өткізілмей, үздіксіз түрде өткізілсе нұр үстіне нұр болар еді. Өйткені туған жерді аялап, күтіп ұстау өзіміздің қолымызда!
