2025 жылғы 16 маусымдағы №908 Жарлыққа сәйкес, Қазақстан Республикасы Президентінің шешімімен ауданымыздан алты ана «Күміс алқа» мемлекеттік наградасына ие болды. Осыған орай аудан әкімінің міндетін уақытша атқарушы Әлібек Нағыметуллаұлы Нұрадинов аналарды арнайы қабылдап, иықтарына ақ жаулық жауып, құрмет көрсетті.
Салтанатты сәтте Ә.Нұрадинов:
– Елдің ертеңі – бүгінгі ұрпақ. Ал сол ұрпақты тәрбиелеп, елге елеулі еңбек етіп отырған алтын құрсақ аналарға қандай құрмет көрсетсек те артық емес. Сіздердің төккен терлеріңіз, аналық махаббаттарыңыз – ұлттың ұлы мұратына қызмет етіп жатыр,- дей келе, мемлекет тарапынан берілген «Күміс алқа» белгілерін табыстады.
Күміс алқамен марапатталған аналар: Аида Серікқызы Қасымбекова, Майра Маратқызы Төрекұлова, Іңкәр Сәкенқызы Оңлабекова, Света Болатқызы Балшықбаева, Керез Чолпонбекқызы Аширалиева және Арайлым Қалқабайқызы Қасенова.
Марапаттау рәсімінен соң аналар Әлібек Нағыметуллаұлымен естелік суретке түсіп, ақ тілектер мен алғыстарын жеткізді.
