«АMANAT» партиясы аудандық филиалының аудандық мәслихаттағы депутаттық фракциясының отырысы өтті. Жиынды фракция жетекшісі Манарбек Көшкімбаев жүргізді. Оған Саяси кеңес мүшелері, аудан әкімінің міндетін атқарушы Әлібек Нұрадинов, партиялық бақылау комиссиясының мүшелері және жергілікті мекеме басшылары қатысты.
Отырыстың басында Әлібек Нұрадинов аудандық мәслихат депутаты Нұрлан Орынбаевты Теміржолшылар күніне орай «Ауданға сіңірген еңбегі үшін» төсбелгісімен марапаттады.
Күн тәртібінде «АMANAT» партиясының Мойынқұм ауданы бойынша сайлауалды бағдарламасының автомобиль жолдарын салу және күрделі жөндеу, интернет жүйесін дамыту, құрылыс және инфрақұрылымды дамыту салаларына қатысты 2025 жылдың І жартыжылдығына арналған көрсеткіштерінің орындалу барысы қаралды.
Бұл бағыттағы есепті аудан әкімдігінің тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Бауыржан Төлегенов баяндады.
Фракция депутаттары ауыл ішіндегі жолдарды жөндеу, жол жиегіндегі талдарды кесу, кешкі мезгілде қараусыз жүретін малдар, жол белгілерін орнату, ауыз су мәселесін шешу және интернет желісімен қамту көрсеткіштерінің орындалмау қаупіне байланысты бірқатар сындар мен ұсыныстарын жеткізді.
